今天AL放榜，成績沒甚麼驚喜，大部分同學都已經預先定好了出路，所以今日都係幫下有需要的同學寫寫推薦信，又或者給他們一點繼續升學的意見。

仔仔早幾日「拗柴」，這幾天都係一拐一拐的，食野都無乜心機，前日帶他看了醫生，應該無脫臼或斷骨，不過要休息一下，所以食左葯就訓到隻豬咁，很可憐！

上個星期主要都係食。星期一黎Sir請P.E. Department食飯，星期二全部老師請黎Sir、霍Sir食飯，星期五本來P.E.請番黎Sir食飯，點知比人橫刀奪愛，搶了賬單，強行比了錢，所以要再擇日請黎Sir、霍Sir再食過飯。當晚再繼續食，就係Form 7的謝師宴，真係未食過一餐咁特別既謝師宴。今年不再送金山詞霸做禮物，雖然係好野，但係已經送左好多年，所以改了送另一份禮物。這幾個月都買了好幾對小喇叭，有些還內置讀咭及MP3功能，有一部更有埋收音機。不過前幾日在又一城再買了另一對身材嬌小，但聲大夾靚的小喇叭，共有四隻顏色，由於想襯番部舊MP3機，所以買了白色，4粒AAA叉電用到八個小時以上，是近期幾滿意的玩意，不過個日就買貴了少少。玩了幾日非常滿意，所以就買了一部黑色的做Form 7謝師宴的禮物，不過今次在星際買，只係兩舊水，平了近四十蚊。

星期四在學校約了幾個舊生老師與黎Sir和霍Sir影相留念，學校今年四十週年紀念，他們就由開校教到如今，又係足足四十年，跟住退休，真係唔容易，所謂無功都有勞，更何況他們帶領的籃球隊和乒乓球隊，在過去的日子，為學校贏取了不少獎項，相信很多同學和舊生都會不捨得他們的離去。一間學校能夠在同一時間有七個舊生老師在任教，唯一解釋就係「正」。以下兩張相真係唔簡單，人只得九個，但論輩份竟然已經係四代同堂，有幾多間學校可以做得到？相信隨時入得到健力士世界紀錄大全。不過明年黎Sir和霍Sir走了之後就大劑了，因為我從此便榮升老餅，第日再四代同堂時就可能係由我數起，時間真係過得快。

今個星期恩信的小學復課，開始考小五呈分試，所以這個星期邊度都唔使去，放學便要返屋企幫佢溫習，重慘過自己考。

明天A Level放榜，祝大家好運！

終於等到衛生防護中心和教育局的豬流感緩疫階段發給中學的信件和「學校舉行集會及課外活動指引」，果然一如所料，又係將個波抛番比學校，由學校自己決定是否提早放暑假和繼續舉辦試後活動。於是有些學校即刻放暑假，停止所有試後活動，亦有學校當乜事都無發生過，馬照跑，舞照跳。呢Ｄ指引，使乜比咁多錢班高官寫。

對於我們搞體育的，當然最關心的是能否繼續安排校隊訓練，因為如果自己唔練人地練，下年比賽就會好蝕底，暑假的訓練是非常重要。不過靠個份指引，就真係唔知點做，就好似向人問路，人地卻一隻手指住東，而另一隻手卻指著西一樣。就好似以下兩點，真係睇左都唔知意思係點。

第六頁：

“戶外、在空氣流通環境下舉行的活動，可讓更多人參加。不論參加人數如何，人羣控制和避免人羣聚集都十分重要。”

問題：咁即係話可唔可以比多Ｄ人參加？

“有身體上常接觸的活動(如球類活動)，參加者應特別注重個人的衛生。”

問題：咁樣應該點樣「特別注重」衛生？

我覺得從小學及幼稚園停課開始，當局的做法已是十分矛盾，一直強調幼童較容易受感染，但每日出現的確診個案都有屬於不同年齡組別的人士。那份「學校舉行集會及課外活動指引」的第一頁一開始個段就講：

“雖然大部分人類猪型流感患者的病情相對輕微，卻因市民缺乏抗體，有關流感得以在本地迅速蔓延，尤其在兒童和青少年間。”

問題：中學生正係屬於青少年的組別，咁點解中小學的處理會有咁大的分別？是否最重要還是考完哂Ｄ試先，以減少行政上的麻煩？如果係咁，究竟係表示行政方便緊要過健康還是隻流感真係「流」既呢？

叫停哂全港Ｄ暑期活動又怕影響經濟，亦怕Ｄ學生無所事事，兩樣都會比人鬧；但係叫大家馬照跑，舞照跳亦怕萬一出事有死人的話亦會背鑊（因為受感染的人越多，有人死的機會越大，唔使做研究都可以確定），最好當然就係由學校自己決定。

根據世衛的數據，至2009年6月24日為止，全球「上報」受感染的人數為55867，死亡人數為238，死亡率為0.426%。，算唔算高就見仁見智，單是美國就有21449人受感染，87人死亡，不過有Ｄ國家（包括美國）現在已經無再上報數字。

至於香港方面，截至2009年6月25日2:30p.m.為止，共有506個確診個案，幸好暫時仍沒有人死亡，不過其中288宗在過去七天內確診。所有確診個案中，337宗已經康復出院，169 人仍然留醫，情況穩定（無需深切治療及沒有死亡個案）。

從以上圖表可見，最近十日的確診人數顯著增加，今晚又有多62人確診和3間中學明天要停課，所以輪輪下都好快輪到咁。其實目前最驚係兩樣野，第一係隨著受感染的人數增加，病毒有機會變種，而且變變下會死人；第二就係受感染要入院隔離。暫時病毒變種的機會似乎未係咁高，反而係比較怕要入院隔離，因為入到去可能會中其他野，就算無事都要被困14日都幾悶。

我認為應否繼續校隊訓練應該睇兩樣野，第一當然就係受感染後會死人的機會高唔高，第二就係受感染後的處理手法。第一點真係相信無人會知，因為就算係個批專家都唔敢講。以目前的走勢，每天受感染的人數唔再急增都會保持在這個水平，如果每日幾十個，根本就無可能全部確診者都要入院隔離，所以政府亦開始放聲氣話遲Ｄ確診但病情輕微者可能只需在家隔離（亦即係唔使隔離，因為無人check），所以到時就可以比較安心的進行校隊訓練（假設受感染後的徵狀沒有變得更嚴重，亦無死人）。

目前的最佳做法似乎還是等多十日八日，正式放暑假前才作最後決定。整體來說，我認為身體接觸較少的活動如田徑、長跑等，可以繼續進行。乒乓球和羽毛球雖屬室內運動，而且雙方球員都有機會接觸到球，但始參與的人數較少，並且在冷氣中進行，出汗會較少，所以只要回校前先探好熱，確定沒有發燒及其他流感症狀，入校門前再用消毒酒精洗手，活動進行時盡量注意個人衛生，多去洗手洗臉，不共用毛巾和水樽，應該都可以減低受感染的機會。至於籃球和足球，雖然在戶外進行，但係身體的接觸（特別是球的方面）較多，出汗又多，難免經常用手抹汗，所以屬於較高危運動，最好還是睇定Ｄ才決定是否繼續舉行。總之，無論參與任何校隊訓練，都應該做足探熱和消毒等步驟，覺得唔多舒服就千萬不要回校參加訓練，以免累已累人，咁就應該安全許多。其實就算唔返學校參加任何訓練，都可能會在街惹到流感，只是要盡量避免在校內發生，因為一旦強制停課就會影響到其他活動的繼續進行，甚致如期開學。

在傳染病流行期間，就算組織體育訓練，其實亦要把運動量調低。自從1990代開始，已經有不少研究報告指出，中等強度的體育活動，能夠增強身體的免疫力。但高強度的體育鍛煉，反而會降低免疫力，特別是活動完結後的三至廿四少時內，所以在這段期間要特別注意保暖，否則就更易患上呼吸道疾病。如果有興趣，可以在Google search 下“Sport and Immunity”，就可找到不少相關的研究報告，有Ｄ要比錢才有得睇，但亦有不少是免費，又或者可以看看我較早前（其實是十年前）寫的《運動與免疫》。

今天去完教堂，吃過午飯，便一家人去又一城逛書局，因為恩信已經看完了之前買的所有小說，不過買不到他心目中的那套書，便再入沙田試試，行了兩間書局，都只見第二及第三冊，卻沒有第一冊賣，最後返大圍商務再碰碰運氣，結果有第一及第二冊賣，但係又無第三冊，終於先買了第一及第二冊，過幾日再入沙田買埋第三冊。

我都唔執輸，買了一套靈修版聖經，貪佢一開五冊，唔使咁重，之前個本一冊過雖然精美，但係實在太重，唔方便攜帶，電子版的字又太細，老花看不清。粵語聆聽版已經重復聽過了幾次，有些書卷甚致重復聽過了幾十次，不過裡面的人物實在太多太亂，有些人名重復了但係又並非同一個人，單是聽很難分辨得清，所以都係決定重新睇多次，加深認識一下，話哂聖經都係全球最暢銷書籍，值得花點時間睇番幾次。

上星期四晚的 Presentation 都算幾成功，所謂一雞兩味，個 Reading to Learn PE website 整左咁耐，當然係順便用來交埋功課，話哂它暫時仍然係全亞洲唯一一個有齊咁多體育理論內容的網站。放左學便回家教恩信計數，無法，要準備五年級學期尾的呈分試。當日也是很特別的日子，因為假腳王添丁，家中多了一隻小波牛，將來可以上陣不離父子兵，恭喜哂！

星期五朝早過灣仔擇日舉行下年的陸運會，今年第三十九簽，都算係下下簽，因為次序係第二輪尾二，不過最後都能夠仍然在十月初舉行陸運會，至少唔使在九月尾搞埋。

今個星期是考試前的最後一個星期，亦即係很快又到學期尾，所以除了是要執埋Ｄ手尾外，當然就係不停的開會，上個星期做了一個統計，寫低了今年的 non-teaching duties，原來有成十幾樣，以每樣每年最少開三次會計，再加埋每年至少十次的 staff meeting，每年最少有四十幾日放學後要開會，唔怪得知成日要叫馬騮仔和隊長幫手睇住Ｄ training。

這個星期決定放棄睇英文小說，一來點都係追唔上恩信，二來係睇完都唔覺得有甚麼得益，所以決定都係睇番 PE 個Ｄ書，話哂睇完可以寫下野，有Ｄ貢獻。星期四教育局終於宣佈小學及幼稚園停課，所以恩信唔使返學，除了在家溫習外，就是睇書，上個星期買給他的小說應該兩日內便會睇哂，他已經有了新的 targets，都係同學睇緊的書，所以朋輩的影響真係非同小可，如果係好野，就當然係值得慶幸，但係如果係衰野，就真係死得，所以搵間好學校真係很重要，也是目前很頭痛的事。

最近仔仔非常痴纏，唔單止食野要我陪住，晚晚重跳上我枕頭幾次，又哄又啺，真係頂佢唔順。

星期日返教堂聽道，內容好似係完全為我而設，真係差不多答哂心中的疑惑，倍覺得自己的決定無錯，積極的生活和工作態度始終較適合我。

星期一晚出完夜街，在回家的途中，究然無意間幫人做了成個鐘頭輔導，自己既是過來人，所以亦希望可以開解下人，幫人盡快渡過難關。人生不如意事常八九，懂得放下才是最重要，否則只會終日被困仇城，無法自拔。

這兩天的天氣異常悶熱，昨日一起身便已覺得唔多舒服，個喉嚨很乾涸，下午還有少少頭痛，於是一放學便回家休息，一直睡至六點幾才起身，但係都沒有胃口食飯，夜晚只是食了些米粉做宵夜便再睡過，幸好今朝起身返學時已覺得精神許多，應該無事。

上星期出完兩份卷，便繼續做埋份功課和個 PowerPoint，明天下午要返 HKU 做 Presentation，順便交埋份功課，便可以安心執埋學校Ｄ手尾。

明天是六四，廿歲以下的年青人許多都不知當年發生過甚麼事，記得當年今日的晚上，在家中做緊筆記和教材，一直做到深夜，一邊做，一邊在聽收音機，因為已經連續很多日都有學生在天安門靜坐，而且事情似乎發展得越來越糟糕，當晚的情況也越來越緊張，所以一直都不想關收音機，不知不覺，已經做到六月四日的零晨，繼續一邊做一邊聽，已經不記得是甚麼時間，突然間聽見電台的現場新聞報導員說軍隊開槍，起初還以為是橡膠子彈，誰知竟聽到新聞報導員說有許多人倒下，被抬離現場，而且從他震慄的聲音亦可感覺到那位報導員所感受到的驚慌和難以致信，當時只有一個感覺，我們的國家為何竟然窮得連橡膠子彈也沒有，還是完全未應付過這類場面，竟然要用上真槍實彈，向人民掃射，甚致還要用上坦克車來清場，把人民壓成肉醬。當年日本人對我國人民進行南京大屠殺，至今仍不斷否認事實，並希望讓時間把惡行淡化。今日的中國，經濟、運動、科技，甚致軍事，已經直迫那些所謂超級大國，但到今時今日，仍沒有勇氣去承認當年的錯誤及承擔當年的責任，比起日本人否認南京大屠殺又有何分別，身為中國人，也難免覺得羞恥，對於那些為了個人利益而為當權者說好話，歪曲事實的人，就更覺得他們無恥。如果想知當年發生甚麼事的年青人，上 YouTube 用“六四屠城＂作關鍵字，找些片自己看看吧。

這兩個星期都是忙於做功課和出卷，HKU進修的課程六月要交兩份功課，學校下個月亦要開始考試，今次要出兩份卷，所以這兩個星期真係幾唔得閒。

星期四剛過完端午節，今年都算食得多糉，這個多星期以來都食了差不多有廿隻糉，其中十幾隻是自己買，另外的是學生（家長）送，每天都食糉做宵夜，放假連早餐都係食糉，不過好似食極都唔厭，直至食到昨天才開始覺得有點滯，不過其實最大劑反而是食了很多砂糖，相信累積起來都超過半磅，真係要跑番多Ｄ步先至可以抵消得到。

這個星期要趕功課，所以無乜點睇小說，比亞仔和老婆越抛越遠，似乎真係幾難追得番。

這幾天的豬流感好似殺緊埋離，遲Ｄ一大批留學生從美國和加拿大返港後，相信會很大劑，希望可以考埋試先至爆，唔使連個暑假都無埋。

星期六朝起身，額頭、前臂、大腿前面都變左燒豬一樣，重有點痛，不過還要忍痛過 HKU 返學。放學後趁恩信跟教會去了做探訪，便一個人去了深水埗行街街，不過行了一陣便要趕回家匯合恩信去學羽毛球，所以甚麼也沒有買。

星期日朝入馬鞍山看學生比賽，那天天氣非常炎熱，有七、八個參賽者身體不適，幸好我們全部運動員都無事，還得了三個獎。看完比賽實在有點累，所以返了屋企訓覺覺。

星期一返學簽到時驚見好幾個同事請病假，以為可能是星期四 LS Day 食Ｄ自助餐唔乾淨。點知夜晚睇新聞時重更加驚，因為原來那間酒店有一個確診患了豬流感的遊客，而且同一日正住在酒店中，如果他都有一齊食自助餐，便可以提早放暑假（不過唔好咁開心，因為一定要補番課）。放學同學生落巴富街練跑，不過唔記得帶短褲，所以自己無跑，得個睇字，但係見佢地真係幾辛苦，因為天氣真係很熱，太陽亦得猛。

今日放學又要過 HKU 返學，放學同冬冬一齊食晚飯，並且作了一次宗教的辯論，但係真係很感謝許多人對我靈魂的關心，只可惜自己的心就像法老王的一般剛硬，亦可能是大過自大，不肯謙卑。

用了接近兩個星期，終於看完了恩信的其中一本小說，書名叫 Raven’s Gate，現在開始看第二集，叫做 Evil Star。睇落都幾好睇，以前絕少看小說，今次為了降低成本，亦可在火車上消磨時間，可算是一舉兩得。不過就真係幾難追上恩信，因為他已經看了十一本，星期六打完羽毛球，便和他去了商務再買了另一套叫 Trilight 的系列，見一套四冊有八折便一次過買了，加埋都有二千幾頁，應該可以頂住個零月，而我就真係有排睇。其實這幾套小說都有一個特點，就係個封面設計得很吸引，難怪可以吸引到咁多人買。

Anthony Horowitz 的 The Power of Five 系列

Anthony Horowitz 的 Alex Rider 系列

Stephenie Meyer 的 Twilight 系列

都好多日無寫過日記，就由5月6日說起。

5月6日：在午飯時間為 Lai Sir 和 Fok Sir 搞了一場告別足球賽，因為他們都會在明年退休。他們退休後，也就很難再有三代同堂一起踢波的日子。當日都有成廿人落場踢，並且由 Miss Lau 主持開球禮，睇波的同學就當然更多。雖然我耳仔發炎重食緊葯，但係都唔想錯過一起踢波的機會，結果都落場踢了近十分鐘。

5月8日：放學開完會繼續留下，等睇夜晚的 Variety Show。當晚唱的歌果然如我所料，完全唔合 taste，不過無法，相差了幾代，有代溝一Ｄ都唔出奇，這次志在支持一下學生會，不過都非常欣賞台上表演者的投入和落力演出，這也是同學們值得學習的地方。

5月10日：今日是母親節，無特別慶祝，送了 PTA 設計的母親節咭給老婆，食完午飯一齊行花墟，買了一些花和盆栽，下午再一齊出去買了一隻介指做禮物。

星期一、二、四都有跑下步，試試條氣管好番未，不過都只係輕鬆跑了幾 K。

星期四 LS Day Service，放早去食自助餐，今年帶埋老婆一齊去，因為約了行街睇貓貓，跟住再去花墟買了一些花，準備送給教會一些有需要的朋友。

星期五和學生一齊踩單車兼跑步，當日早上九點半在大圍集合，租好單車後，一行十五人便從大圍出發，經中央公園、馬場、沿吐露港經科學園，到達大埔公園後，便繼續再由公業邨入大尾督，到達目的地後，便在主霸跑了一個來回，總共約 4Km。之後便一齊踩去大埔食飯，跟住再食埋雪糕做甜品後，便回程返大圍。玩完一日，大家都算盡興而返，而且大家都有手信帶回家，就係燒豬仔一隻。我的額頭、手臂和大腿前面都曬到又紅又痛，相信還要捱多幾日。

左：單車檔前。右：馬場盡頭。

左：科學園。右：大埔公園。

左：大尾督船灣淡水湖主霸。右：4K起跑。

左：起步。右：等。

星期五是五、一勞動節假期，接受了教會朋友邀請到隔鄰友校參觀他們家教會搞的賣物會，亦順便參觀下間學校（雖然只限於地下一層），當日場面不算很熱鬧，不過也是正常，一般學校很難吸引到外人來參加這類項目，以前曾經跟學生一同參加過同區一間女校的賣物會，場面就熱鬧很多，因為不單止是學校本身的名氣，學生間的網絡也是很重要，記得當時單是我們的長跑隊便有十幾人一齊去（因為當年她們也有十幾人是跟我練跑），同場亦見到很多她們學校的同學、舊生和其他學校的同學（因為有很多男仔，所以肯定是其他學校的同學）。其實這類活動幾有意思，如果辦得好，可以同自己人和其他人聯絡下感情，雖然事前要做頗多籌備功夫，但想宣傳一下就難免要做Ｄ野，而且最重要反而是邀請一些目標小學來參加，這才更有意思。

星期六、日在家繼續研究下個 Reading to Learn website，因為想加埋個 online pequiz 落去，大致上已經完成，日後只需要得閒又寫幾篇野登上去和再出些題目放落個 online quiz 裡面，目標係最少要放 500 條題目，最好係做到 1000 或以上，不過真係要慢慢來。

今天趁空堂繼續寫埋篇野，原來斷斷續續已經寫左兩年，但係都未埋尾，今日總算叫做完成，不過重要稍為修改一下先放上網。放學和學生落巴富街練跑，自己亦試下跑了兩組 600 m，主要 check 下條氣管好番哂未。跑起來又唔多覺辛苦，亦無跑到「氣咳」，但係跑完講野（特別係大聲講野）時都係間中會咳。返到屋企覺得左邊隻耳仔真係唔多妥，搞到左邊成個頭都抽住咁痛。其實朝早九點幾已經開始覺得有Ｄ唔舒服，吞口水時唔係喉嚨痛而係耳仔痛，而且連左邊的頭皮都有Ｄ痛，當時已經懷疑可能是中耳炎。結果連飯都未食便趕返出旺角睇醫生，醫生話係外耳發炎，而且都幾嚴重，入面已經腫哂，所以影響埋Ｄ神經線，所以會頭都痛埋，搞到又要食葯，又要滴耳，認真麻煩。今年都算係黑，仲衰過前年，氣管敏感加耳仔發炎，成個月都未曾正式練過跑，本來已經上番許多的狀態跌番哂落黎，嚴重影響了今年的練跑大計。

今個星期五晚學生會搞了一個校慶四十週年的 Variety Show，應學生會主席的邀請，在此宣傳一下，有興趣的朋友請盡早購票。