無寫日記成個月，因為最近實在太忙。臨近放暑假，學期尾要趕埋ＤReport、會議記錄、Program Plan、暑期活動報名、開會等。。。多不勝數。

臨近學期尾，很多Department開會，例牌有餐食，本來唔關我事，不過都唔怕面懵，扮熟跟埋去食，所以差不多日日都係食野唔使比錢。直至尾二個日，朝早開完大會，放學便請埋體育部及其他帶隊老師和一班本來打算一齊去游水的同事去食飯，都有兩檯人。不過個兩個星期都差不多日日落雨和雷暴警告，所以食完飯見天色都唔係咁好，便改左去卡拉ＯＫ，都成十幾年無玩過，結果都幾happy，十個人去唱，唱足成四個鐘都係幾十蚊，還包埋兩杯凍飲，認真超值。

正式放暑假，忙上加忙。星期一、三、五朝回校練跑，下午帶恩信去學羽毛球，星期六下午照舊學完圍棋再去學羽毛球，星期日朝去教堂，只有星期二、四和星期日的下午是自己的自由時間。不過其實都唔係幾自由，因為應承和朋友一同寫Ｄ野，結果比自己當初想像的複雜，要花上很多時間，現在只完成了四分之一左右，自己定下八月中便要完成，但係八月有五日去左泰國，所以時間更緊逼，希望能夠依時完成。

由於比左部EEEPC 900恩信，所以大條道理買番另一部機比自己。但係睇中幾部機都難分高下，各有長處、短處，所以這兩個星期亦忙於上網找資料，無論好的、差的review都盡量去發掘，結論如下：

EEEPC 901
優點：價錢ＯＫ，速度ＯＫ，體積細，用SSD硬碟，唔怕震親，電力充足（可頂六個鐘以上）。
缺點：鍵盤細，硬碟細，難以ugrade，最近找到有個review話佢個SSD硬碟似乎比900個個差，大大影響了效率，連900都不如。

EEEPC 1000H
優點：速度ＯＫ，同901差不多，個Mon比901大Ｄ，鍵盤大Ｄ，好打Ｄ，硬碟大Ｄ（因為用HHD），電力充足（可頂六個鐘以上），遲Ｄ有機會轉用SSD硬碟。
缺點：價錢比901略貴，體積大了點，拍得住我部x61，倒不如帶番部x61出街，話哂功能勁好多。

Acer Aspire One
優點：價錢平，個Mon的色彩靚，用SSD硬碟（8G，一件過），鍵盤夠大，好打。
缺點：WinXP版本未出，碟碟容量太細，而且個SSD唔係快個隻，效率比901還要差，電力不足三個鐘。

工人舍SR8
優點：有埋DVD Writer，最細的機種，有Tablet功能，60 GB硬碟，十項全能。
缺點：電力不足三個鐘，行Windows Vista，打電話去Support問野無乜幫助。

Fujitsu U1010
優點：認真細部，大過NDS少少，靚仔，日本製造，三年保養。
缺點：鍵盤超細，很難打字，得1GB RAM，行Vista，另外比錢買大電。

結果：昨日買了Fujitsu U1010，並一起買埋大電和docking，再加多個Windows XP Professional OEM版，搏下可唔可以降落去，不過知道很高難度，特別是可能無法用Tablet功能，雖然對我來說無乜用，但係都會係美中不足之處，希望可以最後搞得掂，其實最衰都係Microsoft，焗人買Vista，私人用家根本在市面上買唔到Windows XP Tablet version，打去Fujitsu度問過，話只有公司的reseller可以買到，好似我地這些私人用家只可以用Vista。其實要用Tablet version亦不難，只要肯比百五至二百蚊人賺下，便可以從網上買到Recover Disk，但係唔想用翻版，唔係怕影響Microsoft的生意，因為唔抵可憐，只係怕比人乘機落毒或入侵。總之，以我廿幾年用正版軟件的經驗就係，用正版軟件真係好笨，比人屈都唔止，肯比足錢都收唔到應有的服務，咁點叫人支持用正版軟件。

今晚由十一點幾就開始重裝Windows XP Pro，但係到而家已經係第二朝成三點鐘都只係裝番哂ＤDrivers，支Tablet同埋有ＤButtons都重係無乜反應，唯有繼續上網睇下有乜解求方法，如果搞唔到就可能要被焗用翻Vista，因為唔想用用下才發現又有甚麼不支援的情況，到時可能更煩。相信這個星期的時間都係浪費哂在剷機和重裝上面。

昨晚話掛三號風球的機會也不大，點知今日下午四點幾改掛三號風球後，今晚十點幾又再改掛八號風球，睇天文台個圖，明天早上會最近香港，所以隨時唔使返學。剛剛開始練番跑，又要停番最少成個星期，好慘！

恩信今日唔舒服，所以無返學，本來打算明天也請假，不過可能唔使，因為如果明天繼續是八號風球，便連請假也慳番。今日應承把新買的 EeePC 送給他，所以他非常之開心，其實咁做主要有兩個原因。第一係唔想佢一條友在房內上網，等佢要在廳中用電腦；第二係有陰謀，因為想買 U1010，只係等緊佢再落多幾個價位。

今天睇新聞，知道 Bill Gates 正式退休，並把所有身家捐哂出來做慈善用途，實在令人敬佩。其實應付了基本生活需要後，再多的錢往往都係用來買了很多不等使的東西，如果能夠將部分用來幫助有需要的人，實在是非常有意義的事。今晚剛看過汪國真的新詩《如果生活不夠慷慨》，正好用來送給 Bill Gates 和其他樂於幫助別人的善長。

《如果生活不夠慷慨》

如果生活不夠慷慨
我們也不必回報吝嗇
何必要細細的盤算
付出和得到的必須一般多

如果能夠大方
何必顯得猥瑣
如果能夠瀟灑
何必選擇寂寞

獲得是一種滿足
給予是一種快樂

今日麥太請食午飯，非常好食，價錢亦公道，遲Ｄ體育部都要去個度食番餐至得，話哂一年的工作已近尾聲，應該好好慶祝一下。

食完午飯到勝利道和金魚街逛，睇下Ｄ貓貓和龜龜，回家前在新世紀買了一個機頂盒，比老婆在睡房睇高清電視，結果她的 comments 就係「點解唔節現？」，男人同女人Ｄ價值觀始終係唔同。

今日一號風球，但係唔覺有乜風，不過今晚的天氣報告卻話明天唔排除會掛三號風球，希望唔好打得成風，否則又有排無得跑步了。

今日下午到城浸開會，因為我們一家會在八月跟教會去泰國短宣，這次主要都是陪太太和恩信去，一同去的還有兩個家庭，今日是給我們做個簡介，亦事先分配好工作，因為我不是信徒，所以與宣教有關的工作主要由其他人做，我就負責所有關於資訊科技、記錄和匯報的工作。

開完會後便到黃金，看看有無 EeePC 的後備電池賣，因為打算帶埋部機去泰國，已經找到了目標，但係卻欠缺 EeePC 用的 cable，大約要過多兩個星期才會有得賣，希望可以趕得及在去泰國前買到。

明天都是監考，放學有同事請飲茶，其實真係唔使咁客氣，幫得到的通常我都必定會幫忙，這是我的優點，也是我的缺點。

連續落了咁多日雨，再加上病了成個幾星期，一真都無得練跑，終於昨日天氣開始轉晴，晚上便跑了一課大圍來回體院。雖然是無跑咁多日，但係跑起來都幾暢順，可能是早排一直都練開 intervals，速度比較快，所以跑番慢Ｄ時舒服許多。不過回程時都要被逼減慢，一來是無練太多日，始終唔係幾夠力，二來則是開始有鼻水湧出來，相信是被吸入的空氣刺激的緣故，所以便減慢少許，但求完成全程，不過時間亦唔算差，跑完哂都係 36:18。

今天全日都要帶恩信去上堂，所以無得跑，夜晚去了沙田 shopping，因為要買番對拖鞋，雖然唔係 100%滿意，但係都算ＯＫ，只是略為貴了少許，不過無乜更好的選擇，所以都要著住先。

今日睇 Hitech Weekly 有所發現，其中一個就是有個幾好用的寫 blog 軟件，叫做 Windows Live Writer，Microsoft 出品，屬 what-you-see-is-what-you-get 寫 blog 軟件，用起來就好似用緊 FrontPage 或 Word 寫 blog 咁，似乎幾方便，這篇日記就是用佢來寫。

個天就日日落兩，個人就足足病了近兩個星期，今天總算好番很多，已經無乜鼻水。日日都焗住食得好清淡，食到人都悶埋，所以昨日食晏都忍唔住在美心食了個冬瓜盅鑊仔飯套餐，真係非常之好味道。

上個星期雖然帶病在身，但係仍舊要帶恩信去參加活動，所以無得點休息。星期日父親節跟教會去西貢戶外康樂中心玩，成個營地得我們幾十人，所以全部設施任玩，唔使排隊，最緊要就係天公造美，好天得來卻無太陽，所以大家都玩得非常開心。

今個星期主要都係監考，所以好悶，而且有時葯力發作，全靠Ｄ漁夫之寶頂住。最近應邀合作做一個 project，如果成事將會是另一個好開始。這幾日開始整理一下Ｄ資料，應該不會有太高的難度，反而時間才是最大的問題，因為已經安排好了暑假的長跑練習和恩信的活動，只有有限的空檔去完成。

這幾天除了教恩信做數外，都是看電視和看書，難得咁寫意。

星期六朝，黃紅黑雨都出齊，只好留在家中。幸好下午天氣好轉，可以照舊帶恩信去學圍棋和打羽毛球。

星期日起身覺得喉嚨唔多舒服，所以無去教堂，改了去旺角睇醫生，下午參加了教會的羽毛球比賽，可惜是雙打，唔係幾慣，所以輸了。晚上幾兄弟和爸爸媽媽去尖沙咀食晚飯，提早做節。由於唔多舒服，所以食之無味。

星期一朝睡到迷迷痴，唔知是九點還是十點左右，突然接到小師妹來電，好似聽到話跑步之類，還以為約我在端午節踩單車或跑步，原來忘記了曾說過當天早上七點入馬鞍山捧她和莉莉比賽場，認真過意唔去。下午見精神好Ｄ，便去了高登逛逛。這幾天都是在家玩高清手指，試過另一個 叫 Totalmedia 的 program 的效果幾好，介面不但靚仔，而且功能強大，本想上網買，要 US$79.9，但係見有Ｄ牌子的高清手指竟然送埋這個 program，計起來重平過上網買個凈 program，所以索性買多隻手指，終於買了輝煌的 Magic-Pro HDTV，HK$450，比起上網買個凈 program 還要平成二百蚊。試完效果亦不錯，而且對 hardware 的要求無隻 wDog 咁高，正好可以安裝在部舊 HP notebook 上面，所以現在可以同時看兩個高清台。到晚上唔知點解，有Ｄ肚瀉，搞到成晚都唔係幾得閒。

星期二起身返學，點知個喉嚨超痛，而且食完早餐又即刻瀉過，唯有請假在家休息，繼續食埋Ｄ葯。睡足差不多全日，淨係食得白粥，真沒趣。

今天起身覺得精神好Ｄ，亦無再肚瀉，便如常返學，不過早上落街時，狂風暴雨，以為又唔使返學。下午回家後又覺得頭痛，還有點發燒，Ｄ葯又食哂，只好再去睇多次醫生。不過今次唔出旺角睇，改去睇恩信個兒科醫生。其實兩個都係好醫生，但係好醫生通常都有兩個特點，第一就係收得平就好多人睇，有排等；第二就係好鬼貴，但係唔使點等。因為唔想浪費時間等睇醫生，所以都係決定去睇恩信個醫生，明天唔使點上堂，可以休息一下，希望快Ｄ好番，因為無練跑好耐，再停便要從頭開始過。

日日都落雨，星期三放學停了一陣，便陪學生練了一陣跑，之後做基本功練習，不過自己無跑，因為朝早出門口時落雨，以為無得跑，所以無帶衫。

星期四，天氣整體上好了很多，終於可以上番體育堂。放學立刻回家休息，養足精神，準備夜晚跑步。點知返到大圍已經又想落雨，到四點幾天都黑哂，唯有通知學生取消練習，不過到六點幾鐘，見天氣又似轉趨穩定，便自己繼續出 JSC 練跑。去到九龍塘火車站，突然想起該晚要去恩信學校開家教會，只好立刻飛的落番九龍城，結果又無得練。

今日帶埋衫衭返學，搏下放學有得練，點知不單止全日下著雨，放學時還黃色暴雨，便跟同事車去了黃金商場，看看能否為部 EeePC 買多舊電，不過去埋總代理處，還是買不到，連總代理都未能答覆幾時有得賣。

這幾天都是在家玩手指，試下唔同位置的接收效果，現在已大致上找到幾個可以穩定地收齊十三個台的位置，並且亦試過錄影節目，而且效果非常滿意，只是檔案的 size 真係太大，半個小時的節目便要超過 3GB 的容量，可能再要買多個 external hard disk 來作錄影之用。科技的進步真是難以置信，單憑一支 USB 手指和一條超小型的天線仔，便可以接收高清節目，而且還可以錄影，甚致燒埋 DVD，只是對電腦硬件的要求較高，日後希望在這方面可以再得以改善。

星期一端午節，所以又有假放。過節當然要食番Ｄ糭，早排在 IPO 階段向儍健認購了四手健康媽的健康糉，昨日終於上市，而且在臨走前獲得分派，夜晚宵夜時食了兩隻，今晚又食了兩隻，果然非常滋味，隻隻都有成粒瑤柱和成隻冬菇，最重要還包含著點點心意，所以特別好食。這個星期已經累計食了六隻糉，而且全部清倉，明天要再入貨，否則星期一便過節都無糉食。不過端午節過後，肯定要跑番多Ｄ，消耗番哂Ｄ能量。

無寫好多日，因為：

上星期日參加恩信學校家長天地籌備的旅行，目的地是北潭涌保良局渡假營，集合時間為早上九時半，地點是他的學校，點知唔記得較鬧鐘，一覺醒來已經九點正，於是梳洗完畢，早餐都未食便飛的去他學校，好彩這類活動通常都要例遲，所以重趕得及上車。去到目的地，上午是親子集體遊戲，午飯後是自由活動，於是便一同去輪射箭，輪了兩個鐘，射了三個 round，終於焗親，頭痛到爆，返到屋企後，由五點幾鐘，一直睡到第二朝五點九起身，如常準備返學。

星期一好彩無乜堂上，放學陪學生落巴富街練習完畢後，便回家休息，繼續睡覺。

星期二，精神許多，晚上如常到 JSC 練跑，6 x 600 m，jog 200 m in 2 min between。始終未回復得哂，平均每個 200 m 的段速都要成 46-47 s，但係都能夠完成整個練習。

星期三放學要開會，天氣亦唔係幾好，所以取消了放學的練習。

星期四，天雨關係，所以沒有出 JSC練習。

星期五，都係無得練，落足咁多日雨，認真無趣。

這幾日無得練跑，索性幫部 EeePC 改裝 Windows XP，結果裝完唔滿意又剷，剷完又再裝過，搞足幾日，終於完成，而且覺得非常滿意，效果超值。

星期六帶恩信去學野的時候，都有帶埋部 EeePC 出去，一來試機，二來出埋份 CIT 卷，發覺個電池都算 OK，可以頂得到兩個幾鐘。雖然耐力紿終及不上部聯想，但係勝在夠細夠輕，如果預計只是用兩個鐘左右，打下野睇下戲，就無必要帶部聯想出街。

星期日去完教堂，牧師又好似代神向我講野，其實我都好明白，所以從來都無緊張過，所謂知足常樂，有多就去幫下人，順便為自己積下陰德。一家人食完午飯，恩信回家溫習（真係可憐），我就獨自去逛街，終於又忍唔住手，見奧運就到，所以去買了隻 notebook 用的 USB 高清手指，本來想買華碩最新出個隻，但係終於接受了個售貨員的推介，買了隻 wDog，如果唔係剛在雜誌見過，真係唔會買，因為個名真係太怪，有Ｄ唔放心。買了回家後一試，效果卻非常理想，用跟機條小型天線都可以收到九個高清台，而且無乜點跳和起格，但係就收唔到原底睇開個四個舊台。就於時間太夜，所以沒有試室內天線。

星期一（昨日），帶埋隻手指回校試下接收，但係只能夠在操場收到。放學和學生落巴富街練跑，練完後立刻回家試下條室內天線，結果可以完全收哂十三個台，效果亦非常理想。

今天早上過灣仔場選下學年陸運會的日子，因為今年是第十簽，所以很多日子可以選擇，結果選了十月十七和廿四日。今日亦買了一條數碼天線連放大器回家，試下接收會唔會好Ｄ，最先可以收到個九個高清和標清台就真係多了一兩格，但係個四個舊台就無乜太大改善。最可惜部 EeePC 個 config 太低，用唔到這類 USB 高清手指，否則以後便出街都可以繼續睇電視了。

昨天放學和學生跑了一個八字圈，天氣實在太熱，要適應一下才可再跑多ｄ。夜晚去新城市廣場食晚飯，之後食個ｄ 雪糕和甜品重貴過餐飯，認真唔抵。食完就 shopping，終於忍唔住手，買了一部新版、白色的 EeePC，行 Linux，貪佢個 hard disk 大ｄ，遲ｄ才轉回用 WinXP。這篇日記就是用佢打，因為個鍵盤太細，所以成日打錯字，而且亦搞到打得很慢，不過唔緊要，因為呢部機有個特別用途，最緊要夠細部就得，日常的運作仍然會用番部聯想。

昨日結算就無咁好彩，壽頭比人質左落去，好彩重有一隻都屬於眾人皆跌佢獨升個類，可以補番條數，所以本週仍可以有賑面利潤撥去捐款賑災，不過下個星期應該無咁好彩，因為唔想再跳來跳去，所以如無意外應該全部都會坐哂艇，不過都會繼續把今個月用剩的零用錢捐埋出去，所以餘下的日子真係要慳ｄ使，唔可以再亂買野。

今日是 Judgement Day，早上被人公審了近半粒鐘。之後回家帶恩信一同過海，與長跑隊員一齊食自助餐，不過當然唔係我請，始終今時唔同往日，自己有頭家，開支大了許多，本來打算把今年賺回來的利潤，除了買點玩具給自已開心下外，都可以請下大家食野，點知今季能夠收復大部分失地就己經叫做好彩，再加上國內天災，身為中國人，很難不加以援手，遲ｄ有機會至請大家再食過。今日是我的師兄 Hase Wong 請客，以獎勵一下各隊員的努力，其實 Hase 多年來都非常支持我們的長跑隊，並曾多次捐助我們的運動經費。今天餐後，他更提出樂意贊助我們兩位老師和六至八位隊員，在十二月去日本參加馬拉松及半馬拉松賽事，如果成事，相信又會是香港學界的另一項創舉。

明天跟恩信學校去旅行，希望天氣不要太熱就好了。